بەپێی ڕاگەیاندنی پەیوەندییە گشتییەکانی زانکۆی کوردستان، لە چوارچێوەی بەرپرسیارێتییە کۆمەڵایەتییەکانی زانکۆ و بە ئامانجی بەهێزکردنی پەیوەندیی نێوان پسپۆڕانی زانکۆیی و هونەری، ڕێککەوتنێکی هاریکاری لەنێوان زانکۆی کوردستان و مامۆستا ئەرسەلان کامکاردا واژۆ کرا.
ئەم ڕێککەوتنە، کە بە دەستپێشخەریی پەیمانگای کوردستان-ناسی داڕێژراوە، جەخت لەسەر چاپکردن، بڵاوکردنەوە و بەڵگەنامەکردنی زانستیی نۆتەکانی بەرهەمە کوردییەکان و بەرهەمە مۆسیقییەکانی دیکەی مامۆستا ئەرسەلان کامکار و هەروەها توێژینەوە و فێرکاری لە بواری مۆسیقای کوردیدا دەکاتەوە.

لە ڕێوڕەسمی واژۆکردنی ئەم ڕێککەوتنەدا، سەرۆکی زانکۆی کوردستان بە جەختکردنەوە لەسەر ڕۆڵی بێوێنەی بنەماڵەی ڕۆشنبیری کامکارەکان لە بڵندکردنەوەی کولتوور و هونەری ئێراندا، ئەم هاریکارییەی بە نموونەیەکی سەرکەوتووی گرێدانی زانکۆ لەگەڵ کۆمەڵگەی هونەریدا وەسف کرد. ناوبراو ڕایگەیاند کە بەرهەمەکانی ئەم بنەماڵەیە بە یەکێک لە گرنگترین سەرچاوەکان بۆ لێکۆڵینەوە لە مۆسیقای کوردی هەژمار دەکرێن.

ئەم هاریکارییە ستراتیژییە، هەنگاوێکی بەنرخە لە ڕێگەی بەهێزکردنی لێکۆڵینەوەکانی کوردستان-ناسی و بەرزکردنەوەی پێگەی توێژینەوەی ئەکادیمی لە بواری مۆسیقای کوردیدا و هیوادارین یارمەتیدەر بێت بۆ پاراستن و گواستنەوەی ئەم میراتە گرانبەهایە بۆ نەوەکانی داهاتوو.